الإسلام والكباب

حالة مزمنة

بجرة قلم و بوش سافر

الخليج الفارسى بقه عربى

و عربيات الفيات عملوها ناصر

و الارض بتتكلم عربى

يا حلاوة القاهر و الظافر

و الوكسة صارت نكسة

و البحيرة ما عادتش ناصر

و التاريخ صار ملطشة

لكل فاجر و داعر

كده تسليك و كده توليع

و كده انجازات و مفاخر

احنا اللى دهنا الهوا دوكو

و احنا اللى خرمنا التعريفة

و جبنا الديب من ديله

و اللسان من لغلوغه

و اللى عصرنا الزمن

و مصمصنا الزعزوعة

بس الخيبة اللى احنا فيها

ليها اسباب خارجية

زى ابن سبأ و كعب الاحبار

و الاسرائيليات المندسية

و الاسلحة الفاسدة و الأقدار

و الموساد و المخابرات المركزية

حالة مزمنة م التواكل

و الدروشة و التكاسل

و تصلب المفاصل

محتاجه جراحة

و علاج عاجل

من الداخل